Holzland zwischen Stadtroda und Gera
http://www.saaleholzlandkreis.de/index.php?id=14
Holzlandgeschichten von Werner Peukert, Herausgeber Stadtmuseum Jena Nr.16
...
Die Quantentheorie
Do is doch itze ener jeschtorm, dar huß Planck un mitten Vurnomn Mox. Dar soll hunnert Johr säe
un hot ewos erfung, dos heßt de Quantentheorie. Ich hob etliche jefreet, wos dos is, awer kener weß ewos
richtches. De Quanten sin doch de Beene, denn uffn Dorfe heßen doch de Schpozierhelzer de Quanten. Bänn
Suldoten worsch nich annersch. Wenn mor do in Räh und Glied schtonn, schräte der Schpieß aach: " Schulze
nehmen Sie ihre Quanten zurück!" Also is dos enne Theorie iewer de Beene. Meglich is dos. Darf dos e Schtudierter
säe, braocht mor sich nich ze wunnern, die nenn doch suwiesu olles annersch. Enne Theorie iewer de Beene?
Mor konn nor mitten Kuppe schittele. Wuhl, es jibt gruße, lange, truckne un aach nosse. Oder sulle dar am Enne
die Schuhe meene? Wenn ich su zerickedenk, do hotten mer als Kinner immer Schuhe, die nich poßten. Emol ze gruß,
emol ze kleen, un monchmol aach welche, die fitschelten. Un nocher hot mor Lecher in Schtrimpfen wie enne Faost
su gruß. Un häte possen die Quanten, doß mor säne Frede dron hot. Häte nennt mor enne Nummer, un do krichste
e Poor hingeknollt, die possen wie objemassen. Eb Max do de Finger dorzwischen hotte? Ich hab mol enn
jekannt, dar sommelte Täächschlomm un ungersuchte Motschpfitzen. Die Lotschen oder de Schuhe nennt mor
doch aach Quanten. Mißte ha de Schuhe meene. Vursichtsholwer guck mor mol noch!
Ha, itze hob ichs: Die Theorie ist der gedankliche Aufbau einer Wissenschaft. Enne Wissenschaft iewer de Quanten, de
Lotschen oder de Schuhe, annerscht ausgedrickt: de Lotschentheorie. Halt, itze hob ichs! Dar hot de Schuhnummern
erfung un akademisch aosgedrickt: Quantentheorie. Putzsche Brieder, die Schtudierten, un do mocht mor su
enne Marde! Wenns jut jieht, schrääbt aach noch eener iewern Käächhusten von dn Laabfreschen. Wunnere tut
mich nischt mehe.
...
